Attassilluartoq isumalluutinillu aannertusaat: Nuuk Nordisk Kulturfestivalip app’i nutaaq saqqummersippaa
Oqaluttuarisaanermi pingajussaanik Nuuk Nordisk Kulturfestivalertoqalerpat ukioq manna oktobarip 7-ani naqitanik pisussat allattorsimaffeqassanngilaq. Pilersaarutaavormi sapaatip akunnerata ingerlanerani festivalimut peqataaniat kulturikkut pisussat amerlasuut malinnaaffigiumallugit app’i aaginnartarumaaraat.
2015-mi 2017-milu Nuuk Nordisk Kulturfestivaleqarnerani pisussat allattorsimaffiat naqitanngorlugu saqqummersinneqartarpoq, ukioq mannali sapaatip akunnera 41-mi pisussamut atatillugu allatut iliussaagut.
Piffissami matumani orpippassuarni ’nunarsuup puaani’ Amerika kujallermi Amazonasimi ikuallannerit aatsaat taama amerlatigisut pineranni, Nuuk Nordisk Kulturfestivali, killilimmik sunniuteqaraluarluni – isumalluutinik atuinissamut sipaarniarluni naqiterisitsiniarnani aalajangerpoq.
Naqitikkanik programmeqassanngilaq, taarsiullugu mobilimut app’i aasinnaassavaat atilik ”Nuuk Nordisk Kulturfestival 2019”, tassani akeqanngitsumik programmi takuneqarsinnaassammat.
”Siornatigutut pissagaluarutta pisussat allatoorsimaffiannik amerlasuunik naqiterisitsissagaluarpugut. Taamani peqataariarlutik programmi igiinnartarpaat – aqaguanilu nutaamik tiguseqqillutik. Isumalluutinik atuilussinnarneq annikillisarniarlugu app’imik nutaamik saqqummersitsivugut – naqitaminngaanniit torrannerusumik,” Nuuk Nordisk Kulturfestivalimi ataqatigiissaarisoq Madelaine Gordon Graadahl oqarpoq.
Programmi isigalugu paasiuminarnerusoq
App’i nutaaq oqaatsit pingasut atorlugit pineqarsinnaavoq – kalaallisut, qallunaatut aamma tuluttut. Atuisut tamarmik akeqanngitsumik aasinnaassavaat, neriuutaavoq festivalertut amerlanerusut festivalimi pisussanut malinnaasinnaalluarumallutik atussagaat, festivali sioqqullugu, festivalertoqarnerani immaqalu aamma festivali qaangiutereeraluarpat.
”App’i pisariitsunnguuvoq nalunaranilu, taamaattumik atuisussanut alutornassagunarpoq. Pisariitsumik sukkasuumillu ullormut pisussat paasineqarsinnaapput. Namminermut tulluuttumik skemaliortoqarsinnaavoq, nuannarinerusat toqqartorneqarsinnallutik, festivalimilu pisussat misigerusutallu arajutsinaveersaarlugit,” Nuuk Nordisk Kulturfestivalimi avammut paasissutissiisartoq (PR-chef) Emil Enemark Sørensen oqarpoq.
App’ip saniatigut Nuup illoqarfittaa assinngorlugu takuneqarsinnaassaaq, pisoqarfissat susoqarnissaalu takuneqarsinnaallutik. Taakkua saniatigut app’imi atortoqarpoq immikkoortiteriffiusinnaasumik, assersuutigalugu ujarlertoqarsinnaavoq qulequtakkaartumik, soorlu: “qitik”, “meeqqanut tulluartoq” imaluunniit “nerisassat” – taamaalilluni pisussat aalajangersimasut misigerusunnerusat nassaarineqarsinnaallutik.
Allatut periarfissaqanngitsunut programmi naqitaq
Programmimik naqiterineq Nuuk Nordisk Kulturfestivalimi unitsivinneqanngilaq. Allattorsimaffimmik naqiterisoqarumaarpoq, festivalip ingerlanerani pisussat ataatsimoortumik quppernermi ataatsimi takuneqarsinnaassallutik. Smartphoneqanngitsut app’imillu aallersinnaanngitsut pisussat pillugit pappiarami paasisutissanik pissapput.
”Soorunami inoqarpoq smartphoneqanngitsunik, taamaattumik programmimik naqitamik neqerooruteqartariaqarpugut. Quppernerpassualimmik naqiterissanngilagut, taarsiullugu qupperneq ataaseq pisussat tamakkerlutik allattorsimaffiat naqitsissagatsigu. Taanna allatut periarfissaqanngitsut atorsinnaajumaarpaat,” Madelaine Gordon Graadahl oqarpoq.
Taakku saniatigut Nuuk Nordisk Kulturfestivaleqarnerani Nuuk Centerimi allagarsiiveqassaaq pisussat pillugit apeqquteqarniartut aamma saaffigisinnaasaannik. Festivalimut atatillugu tikeraat innuttaasullu pisussanik paasiniaasinnaassapput, smartphoneqanngikkunik allagartarsuarnilu paasisatik naammanngippata.
Nuuk Nordisk Kulturfestivaleqarnerata nalaani Nuuk Centerimiititagut festivali pillugu apeqqutissaqaraanni saaffigineqarsinnaassapput.
”Festivalimut atatillugu bilitsisisimasut Nuuk Centermi tajanik pisassapputtaaq. Aamma nittartakkakkut bilitsisereersimasut Nuuk Centerimi pisiniarlutik siuleriiaattut akornanniittariaqassanngillat,” Madelaine Gordon Graadahl oqarpoq.