Kalaaleq atisanik ilusilersuisartoq nuannarineqarluartoq Nuuk Nordisk Kulturfestivalip suleqatigilerpaa
Nuuk Nordisk Kulturfestivali sukkasuumik alliartortuusoq maligassiuisumik kalaallimik atisanik ilusilersuisartumik Bibi Chemnitz-imik ukioq manna suleqateqarpoq. Kalaalerpaluttuliarisartagai festivalimut tulluarluarput. Festivali Nuummi 7.-13. oktobarimi pissaaq.
Nuuk Nordisk Festivaleqarnerani atisat nioqqutissallu festivalimut atatillugu suliat atisanik ilusilersuisartup suliarai.
Nuuk Nordisk Kulturfestivaleqarnerani kingullermi Bibi Chemnitz ilusilersuisuusoq aamma sapaatip akunnerani 41-mi pisussami ilusilersuisuussaaq.
Bibi Chemnitz Kalaallit Nunaanni amerlanerniit ilisimaneqarluartoq atuakkami Dansk Modeleksikonimi allaaserineqarpoq tassaasoq Danmarkimi mutiliortartuni ukiut 100-t ingerlarneranni malunniuteqartut nuimanerit 300-t ilagigaat.
”Nuannareqaarput Bibi Chemnitz Nuuk Nordisk Kulturfestivalimut atatillugu tujuuluaqqanik allanillu ilusilersuisussatut akuersisimammat. Ilusilersugai Nunatsinni Danmarkimilu nersugaalluartuupput, aammalu Bibi Chemnitz nunarsuatsinni ilisimaneqarlualereerpoq”, Emil Enemark Sørensen, Nuuk Nordisk Kulturfestivalimi avammut paasissutissarsiisartoq oqarpoq.
Nuuk Nordiskeqarnerannut atatillugu nasat, tujuuluaqqat, pooqattat qungasequteeqqallu sanatinneqarput. Bibi Chemnitzip ilusilersuisartutut toqqarneqarnera nalaatsornerinnaanngilaq.
”Bibi Chemnitzip suliamigut takutittagai festivalimut qitiusumik pingaartilluinnakkatsinnut tulluartuupput – tassa Nunani Avannarliit suleqatigiinnerat. Bibi Chemnitz Nuummi inunngorpoq, Københavnimi najugaqarluni, tassanngaanniillu ilusilersukkani ilisarnartut ingerlallugit. Nuuk Nordisk Kulturfestivalimi ukiormanna ”Welcome Home” (angerlamut tikilluarit) sammineqarpoq - takorloorsinnaanngilarput Bibi Chemnitzimiit pitsaanermik suleqateqarnissarput,” Madelaine Gordon Graadahl, Nuuk Nordisk Kulturfestivalimi ataqatigiissaarisoq oqarpoq.
Iluatsitsilluarnermik uteqqiineq
Bibi Chemnitz Københavnimi ulluinnarni najugaqaraluarluni nuannaarpoq tulluusimaarlunilu Nuuk Nordisk Kulturfestivalimut suleqataagami, illoqarfimmilu alliartorfimmini pikialaartitsineq pisarmat.
”Nuuk Nordisk Kulturfestivalimut ilusilersuisussatut periarfissinneqaqqinnera uannut isumaqartorujussuuvoq. Isumaqarpunga suliavut torrallakkivut - Nuuk Nordisk Kulturfestivalimi piareersaasuusut Nuummi naapeqqammerpakka, ulapeqaat festivalimik nuannerluinnartumik pilersitsiniarlutik. Qujanartumik ilusilersukkakka torrageqaat, Bibi Chemnitz oqarpoq.
Festivalimi siuliani Nuuk Nordisk-nasat nuannarineqarluartuummata Bibi Chemnitz aalajangerpoq assingusunik suliaqarniarluni.
”Nuuk Nordisk Kulturfestivali 2017-imeersumi suliakka nuannarineqarsimaqaat, neriuunnarpungalu ukioq manna aamma taamaassasoq, illoqarfimmimi alliartorfinni sapinngisara tamaat nuannersuutitseqataajuassaanga,” Bibi Chemnitz oqarpoq.
Bibi Chemnitz Japanimi ukiormanna saqqummersitseqataavoq, neriuutigaalu Asiami nioqqutissiani tunisaallualerumaartut, Kinameersumimmi tuniniaaqqittartumik attaveqalereerpoq. Parisimi mutinik sqqummersitsisarfissuarmi ukioq kingulleq suliaminik saqqummersitsivortaaq. Nuuk Nordisk Kulturfestivalimili nunamini ilusilersukkaminik takutitsisinnaanini immikkuullarissutut isigaa.
”Nuannareqaara ukioq manna pilersitsinerup tungaatigut Nuuk Nordisk Kulturfestivalimi ilaaqqissinnaagama. Nunani Avannarlerneersunik eqqumiitsuliortunik asseqanngitsunik takutitsinermut tapersiineruvoq – ingammik Kalaallit Nunaanni,” Bibi Chemnitz oqarpoq.
Nuuk Nordisk Kulturfestivalimi Bibi Chemnitzip suliaasa takussaanerisa saniatigut isiginnaartunut misigisassanik allanik amerlasuunik eqqumiitsuliortunik ilisimaneqarluartunik erinisuuteqarsinnaapput. Pilersaarusiami ilaapput kalaaleq eqqumiitsuliortoq tamatigoortoq Jessie Kleemann, qallunaaq popimik erinarsortartoq tusaamasarsuanngoriartortoq Alexander Oscar, Hollywoodimi filmiliaritittartoq Makka Kleist, illussanik titartaasartoq grækerinit svenskinillu kingoqqisoq Konstantin Ikonomidis, erinarsortartoq qallunaaq nersornaasigaq Pernille Rosendahl aamma rappertartoq Tarrak aammalu festivalip pilerfiani Nuummeersumi elektroniskimik nipilersortartut The Bartali Crew.
Soorunalumi pikialaartitsinermi eqqumiitsuliortut allarpassuit peqataassapput.