Nive and the Deer Children
Nipilersoqatigiit Nive and the Deer Children albummiliaat pingajuat saqqumminnginnerani (ukioq 2026-i aallartinnginnerani saqqummissamaartussaq), Suialaa Arts Festivalimi appittussaapput ulloq Oktoberip 26-t Sapaatikkut Katuami nipilersuusiaat nutaanerit nalunnginneqarnerillu nipilersuutigisussaallugit.
Nipilersoqatigiit siullermik albummimik saqqummersitsipput ukioq 2009-mi taassumalu kingorna Crown Prince Couple’s Stardust Nersornaataannik nersorneqarsimapput albummiliartik taanna tunuliaqutigalugu ukioq 2012-mi. Saqqummersitseqqaarnerminilli ukiumilu 2016-mi albummi aappassaa saqqummernikuunerani nunarsuarmi sumiiffiit assigiinngitsuni nipilersoriarlutik angalaartuarsimapput.
Nipilersoqatigiit Nive & the Deer Children festivalini nipilersorfinni arlalinni Kalaallit nipilersortut siullerpaasarsimapput, assersuutigalugit SXSW, Pop Montreal Alianait Arts Festivalimilu Iqaluit, Nunavummiittumi. Nipilersortarnermi saniatigut, Nive Nielsen nunani assigiinngitsuni isiginnaartitsisartarnini ingerlaatigisarsimavaa.
