Nuummi Nunat Avannarliit Kulturisioqatigiinnerisa taaguutaat allanngortinneqarpoq periusissiarlu nutaaq saqqummiunneqarluni

Kulturisioqatigiinneq maannakkut Suialaa Arts Festival taaguutigilissavaa.

2025-mi Nuummi Nunat Avannarliit Kulturisioqatigiinnerat ukiut qulinngorlugit nalliuttorsiutigineqassaaq, tassungalu atatillugu taaguutaa allanngortinneqarpoq. Taaguut nutaaq tassaavoq Suialaa Arts Festival, ilaatigullu kulturisioqatigiinnerup ineriartorneranik takutitsisuullunilu issittumut tunngasuunerulissaaq. Kulturisioqatigiinnerit siuliini taamatut ineriartortoqartoq ersarereerpoq, maannali festivalimut periusissiami toqqaannartumik allassimalissaaq.                                                                                                               

”Festivali 2015-imiit ineriartorsimavoq, taamaattumillu innuttaasut politikerillu, Nunap avannarliit pivallaarnagit, Issittoq annerusumik pingaartinneqarnerunissaanik kissaataat tusaaniarsimavagut. Festivalimi taakku marluutillugit ilaatinneqassapput, taamaattorli kalaallisut taaguuteqartinnissaa pingaartipparput, taaguutaanillu allanngortitsineq uagut qaaqqusisuunitsinnik takutitsisuussaaq. Peqatigitillugu nunat assigiinngitsut sammineruagut, taaguutaa nutsertarunnaassavarput, festivali ataasiinnarmik taaguuteqassaaq, tuluttullu taaguut Arts Festival toqqarparput”, Festivalimik aqutsisoq Susanne Andreasen oqarpoq.

Suialaa oqaatsimit "Sueq"-imit allannguineruvoq.  Sueq sakkukitsoq, anorsaannguaq, sivikitsunnguamik suialaartoq.

Assilialersuutaavoq festivalip massakkut pineranik "susoqartitsilaarneranillu".

Festivalillu ingerlanneqarfianut aamma attuumassuteqarpoq, Nuuk anorlerajuttarpoq, festivalernerlu anorip sakkortussusaanut nalimmassarneqartariaqarpoq. Taaguutaa Nuummut, silamut festivalimullu attuumassuteqarpoq.

Oqaaserlu taajuminarlunilu kajungernartuuvoq. Kommuneqarfik Sermersooq aamma Kalaallit Nunaanni Nunani Avannarlerni Piorsarsimassutsikkut Attaveqaat, festivalimi piginnittut, taaguutaanik allannguinissamik aalajangiisuupput. Taaguut festivalimik suleqateqartunit, eqqumiitsuliortunit suleqatigiinnit, toqqarneqarpoq, taakkulu ukunaneersuupput Kalaallit Nunaanni Nunatta Isiginnaartitsisarfia, Katuaq, Nunatta Atuagaateqarfia aamma Nuummi Eqqumiitsulianik Saqqummersitsivik il.il. Kalaallit Nunaanni Nunatta Isiginnaartitsisarfianit Vivi Sørensenimit taaguut Suialaa, tapersersorluarneqartoq, siunnersuutaavoq.

”Suialaa aamma Kunngimut – eqqumiitsuliortut annersaasa ilaannut - nersorinninniarneruvoq. Kunngi (Frederik Kristensen) taalliornermi, nipilersornermi, assilialiornermi, isiginnaartitsinermi suliaqarsimavoq taamaasilluni festivalimi sammineqartut tamakkingajallugit suliaqarfiginikuullugit. Kunngip Suialaamik qulequtalimmik taalliaqarpoq, oqaatsillu taalliatut atorneqarnera assut nuannaraarput”, naggasiivoq Susanne Andreasen.

Taaguutaata allanngortinnera ilutigalugu Suialaa Arts Festival 2024 - 2027-mut periusissiaq suliarineqarpoq, tamannalu maanna saqqummersinneqarpoq atuutilersinneqarlunilu.

Periusissiornermi apeqqutitalinnik immersukkatigut innuttaasut kissaataat tusaaniarneqarsimapput, taamatuttaaq eqqumiitsuliortunik, kulturilerisunik il.il. apersuisoqarpoq.

Borgmesteri Avaaraq S. Olsen oqarpoq: ”Festivalimit Nuummi suliffeqarfiit kulturilerisut qanimut suleqatiginerisigut kulturikkut periarfissarpassuaqarnissaa pillugu  akisussaaqatigiippugut. Isumaqarpunga tamanna pingaartuusoq. Tamatuma saniatigut festivali eqqumiitsuliornermut kulturilerinermullu piujuartitsisumik suleriaasissaqarnissamik pisussaaffeqarpoq, tamannalu kommunimi aamma pingaartilluinnarparput. Tassa ilaatigut siunissami kikkut tamarmik 18-it inorlugit ukiullit akeqanngitsumik festivalimut peqataasinnaassapput, tamannalu amerlasuunut iluaqutaanissaa neriuutigaara. ”

Susanne Andreasen” nangippoq: ”Taaguutaata allanngortinneranut atatillugu festivalimut takussutissiat nutarterlugit suliarineqarput, taakkulu nittartakkakkut inuit attaveqaqatigiittarfiatigullu saqqummersinnissaat assut qilanaaraarput. Suut tamaasa nutarternissaat sivisulaarsinnaavoq, taamaattumillu allannguinermut atatillugu kukkusoqarsinnaanera inunnit paasineqarluarneqassasoq neriuutigaarput”.

”Festivalip tullia ungasikkaluartoq uninngaannanngilagut, ilaatigut Kalaallit Nunaanni, issittumi nunanilu avannarlerni suleqateqarluta, maani Nunatsinni nunanilu allani aaqqissuussassanik suliaqarpugut. Suliassarpassuaqaqaarlu aamma attaveqaatitsinni attassiniarluta atuutsitsiniarlutalu, pilersaarusiornerit, aningaasassarsiornerit festivalimillu nittarsaassinerit aammalu kalaallit kulturiannik kulturimullu tunngasunik siammasissunik ingerlatsivugut.

Pisarnertut inuit isumassarsiatsialaateqarunik saaffigisinnaavaatigut.” festivalimik aqutsisoq naggasiivoq.

Pauliina Oinonen, NAPA-mi pisortaagallartoq oqarpoq ”Periusissiaq  annertuutut taarusuppara, ilaatigut Kalaallit Nunaanni issittumilu eqqumiitsuliornernik tunngaveqartunik pingaartitsinissamik suliaqarnissamillu anguniagaqarfiusoq, ilutigalugulu nunarsuarmi tamanut ammasuullunilu naleqquttuuvoq. Siunissami festivalimut malinnaanissara qilanaaraara.”

PAASISSUTISSAT

·         Nuummi Nunat Avannarliit Kulturisioqatigiissinneqartarnerat 2015-imi aallartippoq, piginnittuullutik Kommuneqarfik Sermersooq aamma
NAPA - Kalaallit Nunaanni Nunani Avannarlerni Piorsarsimassutsikkut Attaveqaat. Tassanngaanniit ukioq allortarlugu festivali
ingerlanneqartarpoq.

·         2024-mi maajiminngaanniit festivalip taaguutigilissavaa Suialaa Arts Festival

·         Festivalip tullia ingerlanneqassaaq 23. - 26. oktobari 2025, tassalu ukiut qulinngorlugit nalliuttorsiutigineqarlunilu festivali
arfinilissaanik ingerlanneqassaaq.

·         Festivali Kalaallit Nunaanni kulturikkut aaqqissuussani annersaavoq, ukiorlu allorlugu eqqumiitsuliortunik 200 missaanniittunik,
namminneq piumassutsiminnik suliaqartartunik 100-inik aamma Nuummi peqataasunik 2500-nik katersuutsitsisarpoq.

·         Festivalimi eqqumiitsuliornernik tamanik sammisassaqartitsisoqartarpoq, tassa isiginnaartitsinerit, qitinnerit,
eqqumiitsuliat takuneqarsinnaasut, illuliortaatsit il.il.

·         Ilisarnaat nutaaq takussutissatullu ilisarnaatissaa Bolt Lamar-imeersumit Arny Mogensenimit suliarineqarpoq

·         Kunngip taalliaa Suialaa taallanik katersukkani uani atuarneqarsinnaavoq: Ippassaq Ullumeqarani Aqagu

PERIUSISSIAQ NAATSUMIK OQALUTTUARALUGU

PIUMASSUSEQ

Suialaa Arts Festivalimit upperineqarpoq eqqumiitsuliorneq kulturilu:

•                  nalinginnaasut saniatigut katersuunnissamut ataatsimoornissamullu periarfissaasoq.

 •                 inuttut pisinnaatitaaffiusoq, ataasiakkaanut immikkut pisinnaatitaaffiunani.

 •                 inuiaqatigiit ineriartortinnissaannut inuussutissarsiutaasoq pingaaruteqarluinnartoq.

ANGUNIAKKAT

Festivalimik peqataatitsisumik naleqquttumillu pilersitsinissaq, tamannalu:

·         issittumi kinaassuseq nunap inoqqaavinillu sinniisuuneq isiginnaartutsinnit peqataasutsinniillu
eqqumaffigineqalernerussasut tulluusimaarutigineqarnerulerlutillu.

·         Nuannersumik misigisaqartitsinissamut qaaqqusisuusutut suliassamik tigusineq.

·         inuiaqatigiit peqqinnarnerusumik inuuneqalernissaannut ineriartortitsinissamut tunniusseqataanissaq.

PERIUSISSIAMI ANGUNIAKKAT 2024 - 2027

PILERSAARUTIP ALLANNGORARTUUNISSAANIK PITSANNGORSAANEQ
NALEQARTITANIK PITSANNGORSAANEQ
ATTAVEQAQATIGIINNERMIK PITSANNGORSAANEQ - TASSUNGA TUNNGATILLUGU BILLETIMUT TUNNGASUNIK PERIARFISSANIK PITSANNGORSAANEQ
PIUJUARTITSINEQ