TAKEOVER - Anna Kolfinna Kuran
“Takeover” 35 minutsinik sivisussuseqartumik sunniuteqarluartumik nalliuttorpalaartumik isiginnaartitsineruvoq, tassani illoqarfimmit arnat 30-50-it Nuummi sumiiffimmik tiguaasutit illutik ilusilersukkamik qitinnermik nipimillu atuinikkut pissusilersuuteqassapput. Isiginnaartitsineq Anna Kolfinna Kuran-ip ataavartumik misissuinerani “Woman Landscape” ineriartorfiusimasoq nutaanerpaajuvoq, tassani ‘landscapes of women’ pillugu isuma misissuiffigaa. Pingaarnertut sumiiffiup arnallu qanoq imminnut attuumassuteqarneranik misissuiffigaa, tassa sumi qanorlu takutinneqartarnersut aamma qanoq ersersinneqartarnersut. Sumiiffinni sorlerni arnat tikilluaqqusaasarpat toqqissisimallutillu sumilu taamaanneq ajorpat? Sumiiffinni sorlerni arnat peqataatinneqarlutillu peqataasarpat sorlernilu tiguaanerinnakkut isersinnaasarpat?
Uani misiliinermi aalajangersimasumi arnat akornanni eqqarleriinneq ersoqatigiinnerlu, arnat akornanni qatanngutitut misigisimaneq, immikkut ukkatarineqarput. Taamaattumik Anna Kolfinnap Nuummi inuiaqatigiinni arnanik 12-100-nik ukiulinnik isiginnaartitseqataasussanik pissarsiussaaq. Illoqarfimmi arnat ikiortigalugit sumiiffik nukimminnik najuunnerminnillu immertutut innera aqqutigalugu sumiiffimmik tiguaasutut iliornissaq anguniagaavoq. Suunngitsutut ittumik tupinnartumillu sunniuteqarluartumik nalliuttorsiortitsinikkut isiginnaartitsisut namminneq nunap assingatut ittumik arnat namminneq nipitik tusartillugit pilersitsissapput.
Isiginnaartitsissut Islandimi nunanilu allani arfineq-pingasoriarluni takutinneqarnikuuvoq. Misiliineq siulleq Reykjavikkimi 2019-imi januaarimi sumiiffimmi mikisunnguami ingerlanneqarpoq, taamanili qitinnermut festivalini, nipilersornermut festivalini, isiginnaartitsinermut festivalini, eqqumiitsulianut katersugaasivinni oqaluffinnilu ingerlanneqartarsimavoq. Isiginnaartitsineq naleqqussaruminartuullunilu sumiiffinni assigiinngitsuni ingerlanneqarsinnaavoq. Suliniummi Takeover-imi arnat 200 missaaniittut isiginnaartitsinikuupput, ilaat isiginnaartitsisartunit ilinniarsimasunit ilaallu siullermeerlutik isiginnaartitsisunit. Taamaalilluni suliniummi inuiaqatigiinni eqqumiitsuliornerullu silarsuaanni eqimattat assigiinngitsut akornanni atassuteqaatit pilersinniarneqarput.
Suialaa Arts Festivalimi isiginnaartitsisartut kikkulluunniit arnarpaluttutut arnatulluunniit kinaassusillit, inuiaqatigiinnit qanorluunniit inissisimaffillit tunuliaqutillilluunniit, saaffigineqarput. Isiginnaartitsisut Kalaallit Nunaanni kulturikkut inuiaqatigiittullu assigiinngisitaarnermik takutitsisuullutillu akunnerminni ersoqatigiittutut misigisimanermik pilersitsissapput. Kikkulluunniit soqutiginnittut peqataasinnaapput, siusinnerusukkut isiginnaartitsinermik misilittagaqarneq piumasaqaataanngilaq. Ilusiliisumit isiginnaartitsisarfissami pingasoriarluni sungiusaqatigiinnissamut naapinnissaq piumasaqaataavoq, tassa isiginnaartitsineq sumiiffimmut aalajangersimasumut naleqqussarneqarlunilu ilusilersorneqassammat.
Isiginnaartitsinermik nassuiaat: Aallartinnermi sumiiffik inoqassanngilaq. Taava arnaq aappaluttunik atisalik sumiiffimmut appakaatissaaq inissaminullu inissilluni. Anersaartornermi saniatigut qatituumik nipiminik nippakkiartussaaq. Isiginnaartitsisartut allat appaluttumik atisallit inissaminnut namminneq inississapput nipitik atorlugit nippakkiartoqatigiillutik. Sivitsunngitsoq isiginnaartitsisartut tamakkerlutik sumiiffimmut kattutissapput nipitillu atorlugit peqataalerlutik. Timitik atorlugu nunap assingatut ittumik pilersitsissapput nipitillu atorlugit nunap assingatut ittoq ilaartortutut issavaat. Tulliattut arnat arriitsunnguamik ingerlaalissapput, sumiiffimmi ilutsinik assigiinngitsunik pilersitsisarlutik. Arriitsunnguamik maniguuttutut pisullutik kattutissapput ilutsinullu assigiinngitsunut ilusilersuillutik avissaartutut ittarlutik. Ingerlaarnerminni nipitik allanngorartittassavaat, nipikillisarlutik nipittortarlutillu, arriitsumillu erinarsorpalaartumik sajukulaartitsisumillu erinarsoriartuaarlutik. Isiginnaartitsineq naggaserlugu arnat uninngaqqissaarlutik kattutissapput, timitik atorlugit nunap assingatut ittumik pilersitsillutik. Tamanna minutsinik 35-nik sivisussusilimmik nalliuttorsiutitut, isiginnaartunut misigissutsinik assigiinngitsunik aqqusaagaqartitsisumik, ingerlanneqassaaq.
