Nuka Alice / Inngerta
Assi: Angu Motzfeldt
Nuka Alice Lund Kalaallit Nunaanni qilatersornermik, inngernermik tivanermillu naliginaasunngorsaaqataavoq. Nammineq inngerusiortarpoq, taakkulu sammisaqartitsinermi takutitsinermilu inoqatiminut ingerlateqqiittarpai. 2009-mi Pauline Lumholdtimit qilaatersorneq ilinniarpaa, ukiumilu tassaani nammineq inngerusiani siulleq pilersippaa.
Inuit qilaatersortarnerat Nunat Tamalaat kulturikkut kingornussat tigussaangitsut eriagisassat 2021-imi nalunaarsorneqareernerisa kingorna namminersortungorluni qilaatersorneq tamakkiisumik sammisarilerpaa.
Nuka Alice maanna inngeruterpaalunnik, kisimi allallu suleqatigalugit, suliaqarpoq, taamaasilluni inngerutit oqaluttuassartaanik oqaluttuarlunilu takutitsinermi akunneq ilivitsoq saqqummiisinnaalluni. Nuka Alicep qilaatersorneq, inngerneq tivanerlu takutitsisarnermigut, inngerutinik nutaanik pilersitsisarnermigut ingerlatitseqqiisarnermigullu namminersortuulluni aallutarai.
Nuka Alice piffinni assigiingitsuni qilaatersorluni takutitsisarpoq. Soorlu 2017-imi Kulusumiu Anda Kuitsilu Inatsisartut ukiaanerani ataatsimiinnerat qilaatersorlutik ammarpaat. Taamatuttaaq ukiut tamaasa nipilersornermik festivali Arctic Sounds 2014-imiilli qilaatersorluni ammartarpaa.
Nuka Alice upernaaq 2025 atuakkiani siulleq Inngerta saqqummersippaa, tassani nammineq allallu peqatigalugit inngerusiai 12-it erinarsoqatigiinnit tulleeriilluni atorneqarsinnaasunngorlugit suliaanik imaqarluni.
